O alcalde de Ribadavia, Marcos Blanco, presentou hoxe en rolda de prensa o programa de actividades enogastronómicas programadas para os vindeiros 5 e 6 de maio co gallo da celebración da XLIX Edición da Feira do Viño do Ribeiro. O alcalde comentou que o cambio de datas vai ser definitivo e que se consolidará durante a primeira semana de maio.

“As actividades enogastronómicas axudarán a consolidar a Feira do Viño e servirán para vincular os nosos caldos coa comida de calidade e converternos nun destino turístico gastronómico de primeiro nivel”, explicou Marcos Blanco. Cómpre lembrar que a gastronomía é o segunda motivación dos visitantes que acuden a Galicia, despois do contorno paisaxístico e cultural.

Entre as actividades propostas resaltan os obradoiros de cociña ou showcookings nos que participarán os mellores cociñeiros de Galicia e que maridarán os viños do Ribeiro con cociña galega innovadora e tradicional. Ademais haberá actividades de cociña para nenos, obradoiros para os visitantes e talleres de maridaxe. O reputado cociñeiro Dani Guzmán será o coordinador destas actividades enogastronómicas e que contribuirán a dar unha imaxe de calidade ao viño do Ribeiro.

Outra das actividades consistirá nunha promoción do comercio local a través do mercado municipal. “Visitarase a praza de abastos de Ribadavia para aprender a maridar os produtos galegos tradicionais cos viños do Ribeiro contribuíndo a dar a coñecer os produtos da horta e alimentación da nosa terra”, explicou Marcos Blanco.

O alcalde salientou que a inclusión deste tipo de actividades contribuirá a darlle un cambio definitivo e unha maior profesionalización á Feira e a fomentar unha maior interactividade e participación dos visitantes, turistas e profesionais hostaleiros. Ademais de axudarlle aos adegueiros a conseguir contactos útiles. Agárdase a presenza de máis de 30 adegueiros e colleiteiros.

O prezo para os que participen nas actividades enogastronómicas será de 4 euros e de 2 para as persoas en paro.

O presidente do Consello Regulador D.O. Ribeiro, Luís Anxo Rodríguez, expresou a súa satisfacción polo cambio de datas e a realización de novas actividades que lle dean un impulso á Feira e unha maior proxección.

ACTIVIDADES ENOGASTRONÓMICAS – SHOWCOOKING

“XLIX FEIRA DO VIÑO DO RIBEIRO”

 

• SÁBADO, Día 5 de maio de 2012:

11.00 h.- Conferencia inaugural.

Imparte: Mercedes González, Presidenta de GALLAECIA.

12.00 h.-Obradoiro inaugural: "Mercado cociñando".

Imparte: Daniel Guzmán, cociñeiro de V TV - LA VOZ DE GALICIA.

 

13.00 h.-Obradoiro de pratos con razas autóctonas.

Imparte: Flavio Morganti. Chef de Casa Galileo - Dous Soles Repsol.

 

17.00 h.-Cata comentada de viños golosos da D.O. RIBEIRO.

Imparte: Mercedes González, Presidenta de GALLAECIA.

 

18.30 h.-Obradoiro de Cociña con produtos de Galicia Calidade.

Imparte: Domingo González. Pte. Asociación Cociñeiros Promotores da Cociña Galega.

 

19.30 h.-Cata comentada de viño tinto da D.O. RIBEIRO.

Imparte: Tres catadores de Asociación Galega de Catadores.

• DOMINGO, Día 6 de maio de 2012:

12.30 h.- Obradoiro de Cociña de vangarda con harmonías do Ribeiro.

Imparte: Javier Rodríguez Ponte "Taky", Chef de Boqueté.

13.30 h.-Obradoiro de cociña INFANTIL.

Imparte: Chef Isaac, profesor da Escola de Hostalería de Vilamarín.

17.15 h.-Cata Vertical e análise das posibilidades de garda dos viño do Ribeiro.

Imparte: Pablo Vidal, Director Técnico do C.R.D.O. RIBEIRO.