A Feira do Viño do Ribeiro, que este ano alcanza a súa 49ª edición, que terá lugar os días 4, 5 e 6 de maio de 2012, no recinto da Alameda, en Ribadavia (Ourense) realizará este ano unha novedosa convocatoria.

O Concello de Ribadavia e o Consello Regulador da Denominación de Orixe Ribeiro teñen a honra de convocar a tódalas persoas que leven por apelido Ribeiro ou Riveiro, a unha xuntanza con motivo da Feira do Viño do Ribeiro, na cal se lle rendirá unha homenaxe por tan alta distinción e entregaráselles un diploma e agasallos conmemorativos por ser “Ribeiro Distinguido”.

CONDICIÓNS PARA PARTICIPAR DA XUNTANZA “RIBEIRO ERES TI”:

• Posuír o apelido Ribeiro ou Riveiro

• Estar disposto a coñecer o Ribeiro e a xuntarse na Feira do Viño para dita actividade.

• Declararse amante do viño e do Ribeiro.

• Confirmar a participación mediante inscrición.

Entre os obxectivos desta iniciativa están o de identificar os apelidos Ribeiro/Riveiro coa comarca vitivinícola do mesmo nome, fomentar a popularización e difusión do viño polo nome e apelidos das persoas que o portan, crear embaixadores da comarca do Ribeiro que a identifiquen polo seu apelido, provocando un sentimento de pertenza e ligar o viño do Ribeiro ás persoas, as orixes e a tradición.

PROGRAMA DOMINGO 6 DE MAIO DE 2012

11:30 h. Recepción e benvida no Concello de Ribadavia.

11:45 h. Entrega do Diploma “Ribeiro distinguido” e agasallos conmemorativos, no recinto da Feira (aula de actividades).

12:00 h. Conferencia sobre as orixes do apelido e persoeiros notables de tan ilustre apelido.

As persoas que cumpran os requisitos poderán formalizar a súa inscrición na Oficina de Turismo de Ribadavia, a través do teléfono 988471275 ou do correo electrónico turismo(at)ribadavia.es e tamén a través das redes sociais (Facebook e Twitter) da Feira do Viño do Ribeiro.

Por outra parte, xa está aberto o prazo para inscribirse no Obradoiro de cociña “Mercado Cociñando”, no que os interesados acompañarán ao cociñeiro Dani Guzmán, a realizar a compra na praza de abastos de Ribadavia dos produtos que, posteriormente, prepararán no recinto da Feira. A inscrición, tanto para este obradoiro como para os restantes, así como as entradas para o “Tren dos Viñedos”, pódese realizar dende xa, na Oficina de Turismo de Ribadavia, a través do teléfono 988471275 ou do correo electrónico turismo(at)ribadavia.es